Lumabas ng bansa patungong United States ang isa sa mga personalidad na sangkot sa maanomalyaang flood control projects.
Kinumpirma ni Bureau of Immigration spokesperson Dana Sandoval nitong Martes, November 11, na lumabas ng bansa si dating Public Works Secretary Manuel Bonoan, dumaan sa Taiwan, bago lumipad patungong US.
Kabilang si Bonoan sa mga pangalang nasa Immigration Lookout Bulletin Order ng Department of Justice (DOJ) dahil isa siya sa mga pinaiimbestigahan ng Independent Commission on Infrastructure (ICI), dahil sa umano’y katiwalian sa higit ₱95 million na ghost project sa Bulacan at isa pang ghost river bank projects na higit ₱72 million.
Kinumpirma rin ni DOJ spokesperson Rafael Martinez na nagtungo sa US si Bonoan para sa medical procedure ng kanyang asawa.
Pinahintulutan ang kanyang paglabas ng bansa dahil nasa Immigration Lookout lang si Bonoan at walang hold departure order laban sa kanya.
ADVERTISEMENT
Mananatili sa US si Bonoan hanggang December 17 ngayong taon.
Sa madaling salita, matatagal pa bago siya humarap sa ICI para sa nagpapatuloy na imbestigasyon sa maanomalyaang flood control projects.
Humaharap si Bonoan sa kasong administratibo dahil sa grave misconduct, gross dishonesty, at iba pang paglabag sa Republic Act 6713 o Code of Conduct for Public Officials.
Share this post:
