Hindi bababa sa 28 opisyal ng National Capital Region Police Office (NCRPO) ang sasailalim sa imbestigasyon dahil umano sa iba’t ibang uri ng kapabayaan sa serbisyo.
Kasunod ito ng isinagawang surprise inspection ni NCRPO chief Police Major General Anthony Aberin sa limang police districts sa Metro Manila noong Mayo 17 at 18.
Napag-alaman ng heneral na walang katao-tao sa ilang police assistance desk, at abandonado ang ilang police post at outpost. May mga pulis ding naaktuhang naglalaro ng mobile games at gumagamit ng cellphone habang naka-duty.
Pinuna rin ni Aberin ang kakulangan ng mga pulis sa mga lugar na may mataas na daloy ng trapiko.
Ayon sa kanya, siyam na opisyal ang posibleng masibak sa serbisyo dahil sa pagpapabaya sa trabaho.
Nagpaliwanag naman umano ang mga pulis na sangkot, ngunit kasalukuyang inaaral pa ito ng NCRPO.
Babala rin ni Aberin, dapat manatiling propesyonal ang mga pulis habang naka-duty.
Ang surprise inspections ay bahagi ng “Go Back to Basics” campaign ng Philippine National Police.
Share this post:
