AFP, patuloy na sinusuri ang security concerns ni VP Sara Duterte at posibleng baguhin ang kanyang proteksyon

Patuloy na sinusuri ng Armed Forces of the Philippines (AFP) ang mga security concern na iniuugnay kay Vice President Sara Duterte.

Ayon kay AFP spokesperson Col. Francel Margareth Padilla, ibabatay sa validated information at kasalukuyang threat situation ang anumang pagbabago sa security arrangements ng Bise Presidente.

Sinabi ni Padilla na seryosong tinatrato ng AFP ang anumang security concern na kinasasangkutan ng matataas na opisyal ng pamahalaan.

Pero hindi niya kinumpirma kung napatunayan na ang mga umano’y banta na binanggit ni V-P Sara.

Ayon pa sa AFP, hindi maaaring isapubliko ang detalye ng threat assessment at security arrangements dahil maaaring makompromiso ang operasyon.

“Ang security measures natin is always subject to assessment if there is a need to adjust, augment or modify security arrangements, that is something our appropriate security authorities will determine. We will not discuss the details publicly because it would compromise the very security we are trying to protect,” ayon kay Padilla.

Patuloy na nakikipag-ugnayan at nagsusuri sa mga security concern ang Vice Presidential Security and Protection Group na nasa ilalim ng AFP.

Sinabi ni Padilla na hindi permanente ang isang security setup at maaari itong dagdagan, baguhin o i-adjust depende sa mga bagong impormasyon at banta.

Giit ng AFP, mananatiling propesyonal at institusyonal ang kanilang pagtugon, anuman ang personalidad o political circumstances na kasangkot.