Hinimok ng Iloilo Provincial Health Office (IPHO) ang mga magulang na suportahan ang school-based immunization program na layong mabakunahan ang higit 80,000 mag-aaral sa pampublikong paaralan sa lalawigan.
Magsisimula ngayong buwan hanggang Setyembre ang “Bakuna Eskwela,” kung saan target ang mga Grade 1 at Grade 7 para sa bakuna laban sa measles, rubella, tetanus, at diphtheria.
Target din na mabakunahan ang mga babaeng Grade 4 para naman sa human papillomavirus o HPV.
Hinikayat din ang mga magulang na dumalo sa Parent-Teacher Association meetings upang mas maunawaan ang kahalagahan ng pagbabakuna at maipaliwanag ito sa kanilang mga anak.
